Dyma’r ddegfed gyfrol ar hugain o Ysgrifau Beirniadol, y gyfres flaengar o drafodaethau llenyddol a ymddangosodd gyntaf yn 1965 dan olygyddiaeth y diweddar Athro J. E. Caerwyn Williams. Unwaith eto, mae’r cynnwys mor amrywiol ag erioed: o emynau Ann Griffiths a’u darllenwyr i ganeuon Edward H. Dafis a’u cymheiriaid; o gyfweliad gyda Wiliam Owen Roberts, awdur y nofel epig Petrograd, i gyfweliad gydag Alex Salmond, Prif Weinidog yr Alban, ynghylch arwyddocâd R.S. Thomas; ac o apocalyps Yma o Hyd Angharad Tomos i alaeth beirdd Cymru yn 1979. Ac i ddathlu pen-blwydd diweddaraf y gyfres, ceir rhestr gynhwysfawr o holl gynnwys y gyfres hyd yn hyn. Y cyfranwyr yw Simon Brooks, T. Robin Chapman, Guto Dafydd, Jason Walford Davies, Hedd ap Emlyn, Peredur Lynch a Pwyll ap Siôn. Golygir y gyfres gan yr Athro Gerwyn Wiliams o Ysgol y Gymraeg, Prifysgol Bangor.
